Editor: 0
லாக்டவுனுக்கு முன்பு அஜித் ஹெச். வினோத் இயக்கத்தில் வலிமை படத்தில் நடித்து வந்தார். முதல்கட்ட படப்பிடிப்பை ஹைதராபாத்தில் உள்ள ராமோஜிராவ் ஃபிலிம் சிட்டியில் நடத்தினார்கள். அங்கு முக்கியமான ஸ்டண்ட் காட்சிகள் படமாக்கப்பட்டது. அதன் பிறகு சென்னையில் சில நாட்கள் படப்பிடிப்பு நடிந்தது. இந்நிலையில் கொரோனா வைரஸ் பிரச்சனை விஸ்வரூபம் எடுக்கவே படப்பிடிப்புகள் அனைத்தும் நிறுத்தி வைக்கப்பட்டது.
கொரோனா வைரஸ் பிரச்சனை முடிந்த பிறகே படப்பிடிப்பை துவங்க திட்டமிட்டுள்ளனர். கொரோனா வைரஸ் பிரச்சனை எப்பொழுது தீர்வது, படப்பிடிப்புகள் எப்பொழுது துவங்குவது என்பது தான் தெரியவில்லை.
இந்நிலையில் ஹெச். வினோத் இயக்கத்தில், போனி கபூர் தயாரிப்பில் அஜித் விருமாண்டி 2 படத்தில் நடிக்கிறார் என்று கூறி ரசிகர் ஒருவர் டிசைன் செய்த போஸ்டர் சமூக வலைதளத்தில் வெளியாகி வைரலாகியுள்ளது. அந்த போஸ்டரில் அஜித் விபூதி குங்குமம் வைத்து முறைத்துப் பார்த்தபடி இருக்கிறார்.
கமல் ஹாஸன் இயக்கி, நடித்த விருமாண்டி படம் கடந்த 2004ம் ஆண்டு வெளியானது. அந்த படத்தால் சர்ச்சைகள் ஏற்பட்டபோதிலும் ரசிகர்களுக்கு பிடித்திருந்தது. இசைஞானி இளையராஜா இசையில் விருமாண்டி படத்தில் வந்த பாடல்கள் அனைத்தும் ஹிட்டாகின. இந்நிலையில் தான் விருமாண்டி 2 படத்தில் அஜித் நடிக்க வேண்டும் என்று ரசிகர்கள் ஆசைப்படுகிறார்கள்.
ஆசைப்படுவதுடன் நின்றுவிடாமல் தரமாக போஸ்ட்ரை உருவாக்கி வைரலாக்கிவிட்டனர். ஆனால் இது குறித்து சம்பந்தப்பட்டவர்கள் யாரும் இதுவரை எதுவும் தெரிவிக்கவில்லை.
வலிமை படம் குறித்து வினோத் அப்டேட் எதுவும் கொடுக்காமல் இருப்பது ரசிகர்களை கவலை அடைய வைத்துள்ளது. வலிமை தயாரிப்பாளர் போனி கபூரோ ஆங்கிலத்தில் எனக்கு பிடிக்காத வார்த்தை அப்டேட் என்பது போன்று இருக்கிறார். இருப்பினும் யாராவது அப்டேட் கொடுங்க ப்ளீஸ் என்று அஜித் ரசிகர்கள் தினமும் ட்விட்டரில் கெஞ்சிக் கொண்டிருக்கிறார்கள். அவர்கள் எத்தனை முறை கெஞ்சினாலும் அப்டேட் வருவதாக இல்லை.
அப்டேட் கிடைக்காத சோகத்தில் வலிமை படத்திற்கு கொஞ்சமும் சம்பந்தமே இல்லாத ஆட்களிடம் எல்லாம் அப்டேட் கொடுங்கள் என்று கேட்டுக் கொண்டிருக்கிறார்கள். இதற்கிடையே அஜித்தின் ஈஞ்சம்பாக்கம் வீட்டில் வெடிகுண்டு இருப்பதாக கடந்த சனிக்கிழமை காவல்துறை கட்டுப்பாட்டு அறைக்கு போன் வந்தது.
இதையடுத்து போலீசார் வெடிகுண்டு நிபுணர்களுடன் அஜித் வீட்டிற்கு சென்று சோதனை செய்தார்கள். சோதனையில் வெடிகுண்டு எதுவும் சிக்கவில்லை. விசாரணை நடத்தியதில் விழுப்புரம் மாவட்டம் மரக்காணத்தை சேர்ந்த மனநலம் பாதிக்கப்பட்ட புவனேஷ் தான் போன் மூலம் வெடிகுண்டு மிரட்டல் விடுத்தார் என்பது தெரிய வந்தது.
புவனேஷை கைது செய்த மரக்காணம் போலீசார் அவரை நீலாங்கரை போலீசாரிடம் ஒப்படைத்தனர். கடந்த 6ம் தேதி தான் புவனேஷ் விஜய்யின் வீட்டில் வெடிகுண்டு இருப்பதாக போலீஸ் கட்டுப்பாட்டு அறைக்கு போன் செய்தார். இது போன்று சும்மா சும்மா போன் செய்து போலியாக மிரட்டல் விடுக்கக் கூடாது என்று போலீசார் புவனேஷை எச்சரித்தனர். இந்நிலையில் அவர் மீண்டும் வெடிகுண்டு மிரட்டல் விடுத்ததால் கைது செய்யப்பட்டுள்ளார்.
