PF Balance: எஸ்எம்எஸ் மூலமாகப் பார்ப்பது எப்படி?
உங்களது பிஎஃப் கணக்கில் உள்ள தொகை குறித்த விவரங்களை குறுஞ்செய்தி மூலமாக எவ்வாறு தெரிந்துகொள்ளலாம் என்று பார்க்கலாம் வாருங்கள்...
தொழிலாளர் வருங்கால வைப்பு நிதி என்பது தொழிலாளர்களுக்கு அரசு வழங்கும் சமூகப் பாதுகாப்புத் திட்டத்தில் ஒன்றாகும். அரசு மற்றும் தனியார் நிறுவனங்களில் வேலை பார்க்கும் தொழிலாளர்களின் எதிர்கால நலன் கருதி தொழிலாளரின் மாதாந்திர சம்பளத்தில் நிறுவனம் சார்பிலும் தொழிலாளர் சார்பிலும் பங்களிப்பு செய்து சேமித்து வைக்கும் பணத்தை தொழிலாளர் ஓய்வு பெற்ற பின்னரோ அல்லது தொழிலாளர்களின் தேவையைப் பொறுத்தோ பின்னர் பெற்றுக் கொள்ளலாம். பணியாளர்கள் வாங்கும் மாதச் சம்பளத்தில் 12 சதவீதம் பிடித்தம் செய்யப்பட்டு அந்த ஊழியர்கள் பணியாற்றும் நிறுவனம் அதற்கு சமமான தொகையையும் சேர்த்து வருங்கால வைப்பு நிதி ஆணையத்தில் முதலீடு செய்யும். இது தொழிலாளர்களின் மிகச் சிறந்த முதலீடுகளில் ஒன்றாகத் திகழ்கிறது.
எஸ்எம்எஸ் மூலம் தெரிந்துகொள்வது எப்படி?
வாடிக்கையாளர்கள் தங்களுடைய பிஎஃப் எண்ணுடன் பதிவுசெய்யப்பட்ட மொபைல் எண் மூலமாகத் தெரிந்துகொள்ளலாம்.
அந்த மொபைல் எண்ணில் இருந்து 7738299899 என்ற எண்ணுக்கு எஸ்எம்எஸ் அனுப்ப வேண்டும்.
இந்த வசதி தமிழ், ஆங்கிலம், இந்தி, பஞ்சாபி, குஜராத்தி, மராத்தி, கன்னரா, மலையாளம், தெலுங்கு, பெங்காலி ஆகிய 10 மொழிகளில் கிடைக்கிறது.
EPFOHO UAN LAN என்று எஸ் எம் எஸ் அனுப்ப வேண்டும். இதில் LAN என்பது நாம் தேர்ந்தெடுக்கும் மொழியின் முதல் மூன்று எழுத்துகள் ஆகும். உதாரணமாக, தமிழில் பெற வேண்டுமென்றால், EPFOHO UAN TAM என்று அனுப்ப வேண்டும்.
இவ்வாறு டைப் செய்து 7738299899 என்ற எண்ணுக்கு எஸ் எம் எஸ் அனுப்பியவுடனேயே பதிவுசெய்யப்பட்ட வாடிக்கையாளரின் மொபைல் எண்ணுக்கு பிஎஃப் பேலன்ஸ், கடைசி டெபாசிட் தொகை உள்ளிட்ட விவரங்கள் வந்து சேரும்.
எஸ்எம்எஸ் மட்டுமல்லாமல், மிஸ்டு கால், உமாங் செயலி, ஈபிஎஃப் இணையதளம் போன்றவற்றின் மூலமாகவும் வாடிக்கையாளர்கள் தங்களது பிஎஃப் நிலவரத்தைத் தெரிந்துகொள்ளலாம்.